Xülasə

Məqalə İngilis dilində frazeoloji vahidlərin struktur-semantik xüsusiyyətlərinin tədqiqinə həsr olunmuşdur və bu ifadələrin dilin leksik sistemindəki rolunu öyrənməyi qarşısına məqsəd qoyur. Frazeoloji vahidlər sabit struktur və məcazi məna xüsusiyyətləri ilə dilin üslub və ifadə zənginliyini təmin edir. Məqalənin aktuallığı ondan ibarətdir ki, qloballaşan dünyada İngilis dilinin öyrənilməsi və frazeoloji vahidlərin düzgün başa düşülməsi, onların funksional tətbiqini təmin edir və ünsiyyət zamanı daha təbii nitq formalaşdırır.Frazeoloji vahidlər struktur baxımından sabitdir, lakin müəyyən hallarda kontekstə uyğun olaraq çeviklik nümayiş etdirir. Semantik xüsusiyyətlərə gəldikdə isə, bu ifadələr adətən məcazi mənalar daşıyır və tərkib hissələrinin birləşməsi nəticəsində yaranan ümumi məna bütövlüyünə malikdir. Frazeoloji ifadələrin tədqiqi zamanı onların mədəni, tarixi və sosial əsaslarının araşdırılması dilin inkişafını və mədəni təzahürlərini daha dərindən anlamağa imkan verir. Məqalə, həmçinin, frazeoloji vahidlərin sabit strukturu ilə yanaşı, onların semantik müxtəlifliyini vurğulayır, bu isə onların işləkliyini və dilin kommunikativ gücünü artırır.